|
طنز : رمضان گلدی
✍️ اوستاد کریمی مراغه ای رمضان گلدی جماعت گئنه سلمان اولاجاق دین اسلام اوجالوب خلق مسلمان اولاجاق گلجک غیرته فاسق اولاجاق اهل تمیز ائتدیغی معصیته جمله پشیمان اولاجاق بزنوب خار مغیلان گیرجک گول دونونا نخل سُنجد دوزولوب سرو خرامان اولاجاق مسجدین تاخجاسی حسرت قالاجاق مهر اوزونه هره بیر مهر تاپیبب بنده ی یزدان اولاجاق بیر محرمده چیخیب شاهقلی بی مسجد دن بیرده بو آی دا گلیب داخل ائیوان اولاجاق اون بیر آی دور یومویوب دور .... یار قلی بی ایندی حمامه گئدوب شاد و خرامان اولاجاق قولاغین دؤرد ائلییب ملایا آغزین آچاجاق باشینی سلکلیب واله و حیران اولاجاق آلاجاق منبرین اطرافینی پولسوز لوطولار پوللولار گلسه ده بیر گوشه ده پنهان اولاجاق هر کیمین خوش سسی وار دامدا مناجات ائدجک آچیلیب حنجره سی بولبول خوشخوان اولاجاق بی طهارت بالالار کی دانیشانمیر سوزنو اولاجاق خلقه موذن عجب عنوان اولاجاق هر اوچ ائودن بیری لازیمدی چخیب وئرسین اذان بختی قاره خروزون قیمتی ارزان اولاجاق آی قوتولجاق باتاجاق جمله نفسلر هامیسی نه اذانچی نه مناجاتچی نه قرآن اولاجاق اوروجون میل ائلینلر گئدجک لر سفره گزجک هریانی زواّر خراسان اولاجاق قوتولور ماه مبارک عمودان گلدی خبر بیست هفتم گئجه سی وارد تهران اولاجاق او آداملار که وئريرلر تومنی بیر قیرانا سره لرده گئجه لر قاری قرآن اولاجاق دوزجک نعمت الوانی داداش سفره لره فقرانین بو جهتدن جیگری قان اولاجاق چکجک رشوه پولینان پلوی دوری لره آتاسین یاده سالوب مایل احسان اولاجاق بئش قیرانلیق اته قادیر دگی بیچاره کاسب یئدیگی سوزمه قاتیق ایچدیگی آیران اولاجاق ترک عادت ائدجک مشدینین اخلاقین عوض خشگه بیر مطلبه احوالی پریشان اولاجاق خرمگس تک گلنه نیش ویروب اینجیدجک گلجک تنگه دلیندن هامی ترسان اولاجاق دولاجاق مسجد و محرابه جماعت سورو تک الده تسبیح هامی عابد دوران اولاجاق بینوا واعظ شهرین بوغازی یرتیلاجاق مجلس موعظه از بس کی فراوان اولاجاق قره کوللوک قوتولوب خان باساجاق باش قاپانا نفسی تنگه دوشوب خسته و نالان اولاجاق قویاجاقدور هره بیر شیشه ی کوچک جیبینه بئش قیران عطره وئریب دسته ی ریحان اولاجاق باتیریپ میلچینی هر دم چکه جک بیغلارینا بیر حنا خونچاسینا قویمالی گلدان اولاجاق بعضی افطارین آچوب جان باساجاق قهوه لره باشی نقله قزیشیب تا کی اوباشدان اولاجاق کبلائی توبه ائدوبدور یاغا پی قاتمیاجاق مشهدی ائیله دیگی ظلمه پشیمان اولاجاق هر کس اوز بد عملیندن ائدجک استغفار نور ایمانیله هر قلب چراغان اولاجاق اتحادیله علی نوکری زهرا کنیزی گلجک مسجده یئر کثرت و طغیان اولاجاق گلجک دسته بدسته باجیلار موعظیه مسجدین هر طرفی روضه ی رضوان اولاجاق کودری چادرا باشیندا مانیکور باشماغیلان فر قویوب تللرینه فتنه دوران اولاجاق گزجک کوچه لری هاردا گورك مرثیه وار سوخولوب هر ائوه هر سمته شتابان اولاجاق بعضی قیزلار کی نه الله نه پیمبر تانیوب آیری یئرلرده گزوب مرثیه عنوان اولاجاق آنالار هر بیری بیر دونبک آلوب قولتوغونا ونگه ونگیله گلوب اوردا نواخوان اولاجاق ایشیوپ کورپه اوشاقلار باتاجاخ فرش حصیر گلجك تنگه ملکلرده گریزان اولاجاق چکجكلر آرادان پرده که عورت کيشی نين آراسیندا او همان پرده نگهبان اولاجاق او طرفده کیشی لر باشه وئريب آغلیاجاق بو طرفده باجیلار گل کیمی خندان اولاجاق سالاجاقدور اله ملّت هره بیر کهنه بیاض ظاهراً بنده پاکیزه سبحان اولاجاق ائله کى چیخدی اوروجلوغ گئدجك اوز ایشینه گئنه اوّلکی کیمین مرشد شیطان اولاجاق یئيجك مال یتیمی آچاجاق ظلم الینی قزادوب صورتنی مثل بادمجان اولاجاق پاکدور حق حسابی داداشون غم یئمه سین یومجاق گوزینی داخل رضوان اولاجاق قورخ او گوندن کسه عماليوى مقراض اجل سینون اوسته ملک الموت نمایان اولاجاق یار و یولداش قویاجاق تک داشین آلتیندا سنی قبر ایچینده بدنون خاکیله یکسان اولاجاق عدل مستنطقی سندن آلاجاق توضیحات حیّ و قهار ائلین عدلیله دیوان اولاجاق یئدیگون نفع ربالر گله جك بورنوندان لیره لر هر بیری بیر آتش سوزان اولاجاق یيغدیغون ثروتی تقسیم ائدجک دور ورثه خانمون اوزگیه همخوابه ى جانان اولاجاق هئچ گناه اولماسا بسدور بیزه بو صوم و صلوۀ بو عبادت دولانوب بیزلره عصیان اولاجاق دئیميرم فضلیله رفتار ائلیه حیّ و کریم اوندا کى قبر خدادن هامی لرزان اولاجاق وای او شخصه که کتابین وئره لر سول الینه باخوب اوز نامه اعمالنه گریان اولاجاق خوش او اشخاصلرین حالينه یوم العرصات که شفاعتچی لری شاه شهیدان اولاجاق نه قدر ساغدی کریمی یازاجاق شعر و غزل سؤزو هر عصرده هر شهرده اعلان اولاجاق داخی بوندان بویانا شعر دوشر قیمتدن هر یئریندن دوران عالمده غزلخوان اولاجاق هر الف با اوخویان شاعر اولوب بانلاياجاق بختی قاره خوروزون قیمتی ارزان اولاجاق شعر_رمضان_کریمی_مراغه ای----برگرفته از وبلاگ ترکهای خراسان برچسبها: اولاجاق, دانیشانمیر, کریمی مراغه ای
+ نوشته شده در شنبه ششم خرداد ۱۳۹۶ساعت 17:6 توسط عبدالحسین
|
|
|
