یولپرسین آلدیغی بیلگیلره گؤره، تبریز، اسکو و آذرشهر میللت وکیلی، مسعود پزشکیان، نصرایله دانیشیقدا، ائتنیکلر و بو فراکسیونون قورلوشونا قارشی اولان نظرلره توخونوب و دئدی: “موخالیفتلر و بو فراکسیونا قارشی منفی تپگیلر، ایکییه بؤلونورلر. بعضیلر اورهک یانماقدان بو مسئلهنی نقد ائدیرلر کی شکسیز گرک بو نقدلر ائشیدیلسین آما بعضی تنقیدچیلر ربطی اولمایان سؤزلری مطرح ائدیرلر کی نه اینانج و نهده اینسانلیق باخیمیندان دوغرودور، البته بو تیپلی تنقیدلر سرحدلرین او طرفیندن ده ائشیدیلیر.”
شورای اسلامی پارلمانیندا اولان تورک بؤلگهلری فراکسیونونون باشچیسی، مسعود پزشکیان، دئدی: “ایران، دهییشیک ائتنیکلره مالیک اولان اسلامی اؤلکهدیر کی بو ائتنیکلرین هر بیریسی اؤلکهمیز اوچون بیر غنیمت فورصت ساییلیر. بو فراکسیونون بو فورصتلری گؤجلندیرمهک چرچیوهسیندهدیر.”
پزشکیان بو فراکسیونون قورولوشون نقد ائدن شخصلره خیطابا وورغولادی: “مواظیب اولون بو توپراغین دوشمنلری، ائتنیکلری اؤلکهده دوشمنچهلیک یارتماق باهاناسینا چئویرمهسینلر.”
او آرتیردی: “بعضی افراطچی تنقیدچیلر همن شخصلردیلرکی ائتنیکلری اللرینده اویونجاق ائدهرک، آیری سئچگیلیکلر و کینهلره سبب اولوبلار.”
تبریز، اسکو و آذرشهرین شورای اسلامی پارلمانینداکی میللت وکیلی دئدی: “بوتون ایرانلیلار، دهییشیک ائتنیکلردن، گرک کولتور و تاریخیمیزین قیراغیندا اؤلکهنی دوزهلدَک و بعضی فورصتچیلره بو ایجازهنی وئرمهمهلییک کی ائتنیکلری باهانا ائدهرک فورصتلری تهدیدلره چئویرسینلر، آما ائتنیکلرین حاقلی ایستهکلرینه بو تیپلی توند داورانیشلار، تفرقه سالیجیدیر”
پرشکیان وورغولادی: “هامی گرک اویاق اولسون کی ائتنیک ایختیلافلار قاباغا گلمهسین و بیر نوع دوشمنین میدانیندا یاریشماسینلار، نیه کی بو ایش چوخ تهلوکهلیدیر.”
خاطیرلاداق کی شورای اسلامی پارلمانیندا تورک بؤلگهلری فراکسیونونون قورولماسی، باشکندده اولان بیر چوخ مئدیانین و سیاسی شخصیتلرین چوخ ایتی تپگی گؤسترمهسینه سبب اولدو. باشقا طرفدن ده بو تنقیدلر، بیر چوخ تورک بؤلگهلری میللت وکیللرینین تپگیلرایله قارشیلاشیبدیر
